उत्तराखंड के स्वादिष्ट व सादा व्यंजन

चौ तरफि हरा-हरा डांडा-कांठा, गाड-गदिन्यों व छंचड़ौं कु छछलाट,
अर वे म मिठु रस मिलांद, चखुलौं कु च्वींच्याट।।
जी हां य तस्वीर च देव भुमि उत्तराखंडे की, जख कि कदम-कदम पर सुंदरता छलकेंद, कुदरते की देन पहाड़ू पर बसियां गौं की सुंदरता मन मा घर बणै दिन्दन, यख कु स्वादुलू खाणू जो कि ताकत भी दींद, जन कि क्वादे कि रूट्टी, झंगरू अर कौंणी कि खीर, अरसा, स्वाला, रोट, दालेकि पकोड़ी, पत्यूड़ा, गैथ का भुटियां रूट्टा, य फिर चैंसू, गथ्वणी, भट्वाणी, गिन्जाडू, छंछिया, तिल अर भांगे कि चटणी, लय्यो कु लूण, कुदाली मोटी रूट्टी, इत्यादि कै प्रकारकु स्वादुलू खाणू बणद उत्तराखंड म।

कुछ लोग पैलि जानकारी का अभाव म उत्तराखंड का खाण पीण थे हीन भावना से द्यखदा छाई, पर जब बटि उत्तराखंड थैं राज्य कु दर्जा मिलि, वैका बाद यु उत्तराखंड कु स्वादुलू अर पोष्टिक पकवान सभी का मेनु म शामिल ह्वेगे, अर यु स्वादुलू, गुणकारी खाणल अपणी एक अलग पहचान बणेयालि। पहाड़ु कू जीवन जनि यखोकु खाणू भी भौत सादु च, जन कि उड़द की दाल पीसी कि मसपणी बणेये जांद अर गैथ पीसि कि बणेय जांद गथोणी, भांग अर जख्या कु तड़का त एकु स्वाद ओर भी मजादार बणा दींद, राई अर पलिंगु का पत्तू ल बणद कफली, भट, उड़द, गैथ अर राजमां रलाके कैकि बणेई दालि कु स्वादेकि त क्वी बात ही नीच। जब जडु का दिन अंदिन त पाफड़ का नैलू का सुक्सा पिंडालु का सुक्सा, जब पुंगड़ मां काम कनो जांदि बगत बणै जांद छाई, मूंग की दाल पिसेये की वैम खिरबोज, ककड़ी, लौंकी थैं कद्दूकस कैरी मिला की बणी बौड़ी कि रस्यलि भुज्जि भी भौत स्वाद हूंद। अल्लू अर मूलेकि थिंचैणी त हर मौसम में खये जांद, पहाड़ी गोल मूला वै थैं सिल्बट म थींची कि बणई थिचैंणी अर उड़द की दाल पीसी मिलैकि क्या स्वाद हुंद। पहाड़ म जमी गीठी, बेवर, च्याणा, तैड़ू कु स्वाद भी भौत अच्छू हूंद। क्वादेकि रूट्टी अर हैरू धणिया, लासण, हैरी मिर्चेकि चटणी बणै रैली त गिच म पाणी आ जांदु। घाम मे बैठिकि लिम्बा छीलिकि, सोली निमालेकि लासण, धणिया कु लूण पीसिकि, चिन्नी मिलैकि मजेदार कछब्वलि बणद। ये कु स्वाद वी जाणौलु जु खालु। उत्तराखंड पहाड़ू मा इना और भी कैई पकवान छन जु कि अपणा स्वाद से तुम थे अपणु बणै दींद, आवा चला अपणा उत्तराखंड।

श्री धीरज सिंह रावत
निर्देशक
उत्तराखंड हिलांस सांस्कृतिक कला मंच (रजि.)
पटियाला, पंजाब।